சிறந்தது கேட்கின்..

வாழும் நாடுகளில் – உன்னை
வாழவிடும் நாடுதான்

சிறந்த நாடு.

பேசும் மொழிகளில் – உன்னைப்

பண்படுத்தும் மொழிதான்

சிறந்த மொழி.

பாடும் பாடல்களில் – உனது

பாலர் வகுப்புப் பாடல்தான்

சிறந்த பாடல்.

பேசவந்த வார்த்தைகளில் – நீங்கள்

பேசாத வார்த்தைதான்

சிறந்த வார்த்தை.

கூடும் கூட்டங்களில் – உங்களில்

குறை காணாத கூட்டம்தான்

சிறந்த கூட்டம்.

நாடும் நண்பர்களில் – உங்களிடம்

நல்லவற்றைக் காண்பவர்தான்

சிறந்த நண்பர்.

செய்யும் தொழில்களில் – நீங்கள்

சேவையெனக் காண்பதுதான்

சிறந்த தொழில்.

செல்லும் பாதைகளில் – நீங்கள்

சேரிடம் அறிந்த பாதைதான்

சிறந்த பாதை.

உண்ணும் உணவுகளில் – உனக்கு

அளவான உணவுதான்

சிறந்த உணவு.

வாழ்க்கைத் துணைகளில் – உங்கள்

வலது கையாய் இருப்பவர்தான்

சிறந்த துணை.